9.02.2011

Цахим Өртөө Дээд Сургуулийн нээлтэн дээр хэлсэн үг

2011 оны 9 сарын 1-ны өглөө 10.00 цагт

1990 онд Ардчилсан хувьсгал ялснаар их зохиолч Д.Нацагдоржийн Хуучин хүү өгүүллэгт гардагчлан Монгол орныг бүрхсэн хөмөрсөн тогоо сөхөгдөж, Монгол улс ЗХУ-ын дагуул орон байхаа болив. Харин энэ удаа "Хөх Монгол Улаан" болсон бус "Улаан Монгол эргээд Хөх Монгол" болсон билээ. Энэ үеэс Монголчууд бага багаар барууны ертөнцийн их дээд сургуульд суралцаж, эхнээсээ хуруу дарам цөөн хүмүүс дэлхийн өндөр хөгжилтэй орнуудын нэр хүндтэй компани, институтуудэд ажиллах болов.

Бүгдээрээ түр хугацаанд 1999 он руу эргэн зочлоё. Алдарт Гүүгл төрөөгүй, Фэйсбүүк сураггүй, дэлхий даяар хүмүүс интернэтэд 56kbps -ийн утасны модемоор холбогддог, нэг сайн фото зураг ч багтаах боломжгүй 3.5 инчийн уян диск хэрэглэдэг байсныг та бүхэн сонсвол гайхах болов уу. Өнөөдөр Google-ээр МОНГОЛ гээд хайхад 330 000 000 материал олдож буй бол тэр үед Altavista хайлтын системээр МОНГОЛ гээд хайхад 30 хүрэхгүй илэрц гардаг байв.

Барууны орнуудад харьцангуй цөөн монголчууд байсан тэр үед интернэтийн МОНСТУДНЭТ чаат өрөөнд хоёр сайхан монгол залуус танилцжээ. Тэд бол тухайн үед Их Британы Кингстоны их сургуульд эконометрикс сэдвээр магистрантаар суралцаж асан Дашзэвэгийн Цэрэнбат, АНУ-ын Массачуссетсийн Технологийн дээд сургууль, Харвардын их сургуулийн дэргэдэх Эрүүл мэндийн мэдээллийн технологийн лабораторид постдокторант хийж асан Др. Ширчингийн Баатар нар юм.

1999 оны 5 сарын 31 нд тэд дэлхийн 7 оронд тархсан 27 гишүүнтэйгээр Монгол Туургатны Цахим Өртөө Сүлжээ имэйл сүлжээг байгуулжээ. Энэ сүлжээнд өнөөдрийг хүртэл дэлхийн 60 гаран оронд тархан суусан 4000 орчим монголчууд, монголч түмэн өөр хоорондоо техник технологи, улстөр, эдийн засаг, түүх, философи, урлаг, нийгмийн бусад олон сэдвээр үзэл бодлоо солилцож, өөр өөрийн очсон орны сонин хачин, соёлын шокоос хуваалцаж, эх орныхоо хөгжлийн талаар ам булаалцалддаг хэвээр. Өнгөрсөн 12 жилийн турш бидний солилцсон имэйлийн тоо 100 000 хол давсан байдаг бол орж гарсан гишүүдийн тоо 30 000 хүрдэг. Цахим өртөөний гишүүд бие биеэ анд, өртөөчин гэж дуудалцдаг.

Цахим өртөөчидийн үүсгэсэн Tsahimurtuu.mn вэбсайт Olloo.mn (2004), News.mn (2009) сайтуудаас даруй 5-10 жилийн өмнө үүсч, тухайн үедээ монголын интернэт дахь мэдээллийн гол вэбсайт болж байв. Бидний гаргасан Цахим Улаач сэтгүүл монголын хамгийн анхны онлайн сэтгүүл байсан төдийгүй, монголын иргэний сэтгүүлзүйн суурийг тавилцсан мэт.

Монгол туургатны Цахим Өртөө Сүлжээний гишүүд зөвхөн имэйл солилцож суухын оронд тодорхой бодит алхамуудыг хийе хэмээн Цахим Өртөө Холбоог 2005 онд байгуулав. Байгуулагдсанаасаа хойш бид гадаадад суугаа монголчуудын сонгуулийн эрх, давхар иргэншлийн асуудлаар төрийн удирдлагад дуу хоолойгоо өргөн тэмцэж, Вашингтон, Сан-Франциско, Сөүл зэрэг хотуудад гадаадад суугаа Монголчуудад зориулсан ажлын яармаг, цуврал лекц, ДОX-ын эсрэг аянг зохион байгуулж, интернэтийн хэрэглээ, Монгол угсаатны тухай ном товхимол хэвлүүлж, Монгол туургатнаа дэмжих хазара оюутны тэтгэлэг, Монголын 7 гайхамшиг зэрэг олон төслийг санаачилж ирсэн.

Та бүхний суралцах гэж буй Цахим Өртөө Дээд Сургуулийг үндэслэгч Цахим Өртөө холбоо ТББ нь өдгөө АНУ, Их Британи, Япон, Австри, Австрали, Герман, Нидерланд, Солонгос, Швед, Швейцари, Финлянд, Монгол зэрэг дэлхийн 12 оронд 108 гишүүнтэй. Гишүүдийн 95% нь өндөр хөгжилтэй орнуудад их дээд сургуульд суралцаж төгссөн бөгөөд 38 доктор, 60 магиструудыг багтаасан монголын шинэ үеийн сэхээтнүүдийн олонлог болсон байгуулага юм.

Дээрх түүхийг өгүүлэгч миний бие 1999 онд яг л та бүхэнтэй адил 18 настай байлаа. 1999 оны хавар АНУ-д дунд сургууль төгсөөд хэд хэдэн гайгүй их сургуульд тэнцсэн боловч халаасандаа мөнгөгүй байсан тул Лос Анжелесийн 2 жилийн хямдхан коллежид элсэн оров. Гэвч багын найзаасаа зээлсэн 200 доллараас өөр мөнгөгүй байсан тул мөн л 2000 долларын сургалтын төлбөрөө төлж чадалгүй бүтэн 1 жил хар бор ажил хийх шаардлага гарсан билээ. Ингээд намар нь Цахим өртөө сүлжээнд хамгийн залуу гишүүн болж элссэнээр ажил, амьдралын томоохон их сургуульд суралцах замаа тавьсан. Өнгөрсөн хугацаанд миний бие Цахим өртөөний олон оронд тархан суусан, дэлхийн түвшний мэдлэг хуримтлуулсан ах эгч, анд найз нараасаа олон төрлийн сэдвээр маш их зүйлийг сурч, одоо ч тэднээсээ суралцсаар л явна. Цахим өртөөнд 12 дахь жилдээ Та бүхэнтэй ХАМТ суралцахаар болж буйдаа би туйлын баяртай байна.

Тийм ээ. Өнөөдөр Монголын ирээдүйг тодорхойлох залуус Та бүхэн Цахим өртөө “их сургуульд” элслээ.

Та бүхэн харин нэг л зүйлийг сайн санаж яваарай. Цахим өртөөний олон мянган гишүүд харь нутагт хүнд хүчир ажил хийж, түмэн зүйлийн бэрхшээлтэй тулж, мэдэхгүй хэлээ сурч, харийн соёлын цочролд өртөж, эх нутгаа санаж, аав ээж ах дүү нараасаа хол байсан. Өнөөдөр зарим нь Мicrosoft, Oracle, Google, Yahoo компанид ажиллаж, дэлхийн нэр хүндтэй эрдэм шинжилгээний институтүүдэд ажиллаж, томоохон их дээд сургуульд багшилж буй. Гэхдээ тэдний туулсан зам дардан байгаагүй юм шүү. Тэд зөвхөн чин зоригтой байж, асар их хөдөлмөр, тэвчээрийн дүнд одоо буй амжилтандаа хүрсэнийг та бүхэн сайн санаж, дор бүрнээ хичээгээрэй.

Түүнчлэн Цахим өртөөчид ямар ч хүнд хэцүү үед зөвхөн улс үндэстнийхээ төлөө, ухамсарт амьдралын гэгээлэг, зөв бүхний төлөө тэмцэж, эрдэм номыг эрхэмлэн өөр хоорондоо үзэл бодлоо уралдуулж, эв эеийг эрхэмлэж бие биеээсээ суралцаж ирсэн билээ.

Цахим өртөөчид өнгөрсөн 12 жилийн турш аливаа улстөрийн хүчнээс ангид, олон ургальч, нээлттэй байх зарчмуудыг баримталж, Соёлт нийгэм, Шударга ёс, Xүний зөвт-эрх, Ардчилсан нийгмийн үзэл үнэт зүйлийн төлөө хамтдаа алхсан юм.

Энэ бүхнийг бид Цахим Өртөөч Үзэл санаа, Цахим Өртөөний Үнэт зүйл гэж үздэг. Цахим өртөөний үнэт зүйлийг хүндэтгэж, МӨН ЧАНАРЫГ нь ойлгож чадсан хэн бүхэн улс орныхоо хүндтэй иргэн, дэлхийн энх тайванч, байгаль орчноо хамгаалагч, шударга ёсыг сахигч, өндөр ёс суртахуунтай, Монгол орны хөгжлийн хөтөч болсон дэлхийн хэмжээний мэргэжилтэн, их өвөг дээдсийнхээ гэрээсийг биелүүлэгч, ЭХ ОРНЫ САЙН ХҮҮ, ОХИН байна гэдэгт бид итгэдэг.

Цахим Өртөө Сүлжээний үе үеийн олон мянган гишүүд, элэг нэгт ах эгч нарын тань өмнөөс, уг сургуулийг үүсгэн байгуулагч Цахим Өртөө Xолбооны нэрийн өмнөөс, тус сургуульд гадаадын олон орноос багшлах Xолбооны эрхэм гишүүд, Цахим Өртөө Дээд Сургуулийн Улаанбаатар дахь хамт олон, багш нарын нэрийн өмнөөс Хөх Монголын цоглог залуус Та бүхний эрдэм номын ИХ ҮЙЛСТ амжилт хүсье! Цахим өртөөчин болсон та бүхэндээ халуун баяр хүргэе!

Монгол орон мандтугай!

Цахим Өртөө Холбоо ТББ-ын Удирдах Зөвлөлийн Дарга
Даваабатын Сайнбаяр

Цахим Өртөө Дээд Сургууль
Улаанбаатар хот, Монгол улс

7 comments:

Anonymous said...

Vnexeer saixan vg heljee. bayar xvrgeye!

Anonymous said...

Za tegeed ih uils ehluulj baigaa tani uneheer saihan sanagdaj bn

Helsen ug ch gesen shineleg tun dajgui boljee!

Land of Lincoln

Anonymous said...

UNEN gedeg bol hunii umch bish gene
Gelee ch uneneeree amidrahyin tuluu zutgesen ter zutgel temtsel chini l Etssiin hemjuur gedgiig sain sanaj yavaarai!

Hunii amidral tun boginohon shuu!

GOOD DAY!

Anonymous said...

Surguuli baiguulj bui ni tun saishaaltai hereg!
Ene uilsiig chini uls ornyi devshliin tuluuh taivan zamaar hiij
bui temtsel gej uzej boloh uu?

Heden jiliin umnu tsahimurtuuguur damjuulan uzel bodol,
Uls ornyi hugjil devshil, hunii hugjil "shine togtoltsoog buteeh shine hunii" talaarhi asuudlaar sanaa onoogoo
surhii ilerhiildeg baisan erhem zaluus haana yu hiij yavna ve?

Mongol dahi ardchilal tsuunhiin umch bolj ted ene baidlaa
ulam l hamgaalj behjuuleed ch baih shig ene bol yaav ch eruul uzegdel bish gedeg ni todorhoi bus uu?!
Baruunyi surguuli soyoloor humuujsen ta buhen
ene baidaltai evrelehgui baih gej naidaj baina!

Terchlen gadaadad suuj bui humuusiin songuuliin erhiig
edluuleh erhiin tuluuh uilsee ajil hereg bolgovol ardchilalyin tom yalalt l boloh biz ee!

Land of Lincoln

Eljigen Dashka said...

Сэдсэн ажил бүр тэнь
Сэтгэлчлэн бүтэх болтугай

Мянга мянган Монгол залууст
Үнэн зөв үлгэр дууриал үзүүлж
буй Цахим Өртөөний хамт олон
та бүхнээр бахархаж байна

Anonymous said...

Zuv uilsiin tuluu zorih gedeg hezee ch amar dut baihgui gedgiig ta buhen harj l baigaa biz ee!?

Gehdee itgel unemshil, zurh setgeliin duudlagyig yu zogsooh bilee...

Tsahimurtuunii echnee taniluuddaa mend hurgeye!

Land of Lincoln
& Land of Free

Jamts Dash said...

Sain exlel. Avto mashin yildverleliin programm xangamjiin chigleleer meregjilten beltgex xeregtsee garaad bgaa shyy. Mongolchuud bid avtomashinii yildvertei boloxod tun duxsun shyy.